إية اللى بيحصل فى إعــلانــات الفيسبوك؟! نكمل ولا نستنى؟! ولحد إمتى هتفضل اللخبطة؟َ
من كام شهر بدئت مشاكل الاعلانات على الفيس بوك تظهر بشكل كبير، فـ تلاقى اللى عامل استهداف كويس إعلانه مش اكتيف ومش بيتسحب من حسابه فلوس، واللى بيتسحب منه بيتسحب بقيمه اغلى من اللى كان متعود يدفعها، واللى متارجت صح و الاعلان مفيهوش مشكله بيلاقى ال reach عالى ومفيش engagement على البوست، و طبعا دة غير إعلانات الليدز الي سعرها ضارب في السما .. وتلاقى نفس الشخص بيعمل اعلانات وتشتغل حلو جدا واعلانات تانيه بتضيع فى الهوا ...
السبب فى كل دا هو الضغط الزايد على الاعلانات، بمعنى ان عدد العارضين اللى بيستهدفوا فئات معينه بيزيد بمتواليات ضخمه فى حين ان جمهور الفيس بوك بيزيد بنسبه اقل بالمقارنه بالمعلنين ، يعنى مثلا انا شركه عقارات و بستهدف فئة الـ A Class والفئة دى اصلا مش كبيره، بالتالى الاعلان ليها هيكون غالى و هيكون دايما فى منافسه مع الشركات اللى بتستهدف نفس الفئه حتى لو مش نفس المنتج
اللى حصل من كام يوم و لخبط الدنيا تماما هو ان تم الغاء الاستهداف عن طريق الوظيفه او التعليم او مكان العمل او اى معلومات مرتبطه بالوظيفه والعمل .. وبالتالى عدد كبير جدا من الاعلانات اتوقف او بقي العائد منه فى الضياع
اللخبطه دى اتقال فيها رأيين :
الرأى الاول بيعتمد على قصه بتدعمها الولايات المتحده وبتقول ان فى حسابات وهميه كارهه لليهود عملت اعلانات خلال الانتخابات الرئاسيه ب100الف دولار لدعم أراء سياسيه تخدم مصالح بعض الشركات، لكن الاهم وسبب الابديت دلوقتى هو اعلان من اكونت روسي معادى للساميه اتعمل بـ 30$ فضحته منظمه امريكيه مدنيه كبيره.. كان نتيجه الاعلان دا ان الفيس بوك قرر يطور من الاستهداف ويلغى بعض المعلومات المرتبطه بالوظيفه بعد ما تعهد مارك بمراقبة والحد من مشاركات الكراهية والتهديدات بالعنف ع الفيسبوك، ودا لان الناس كانت بتضيف معلومه انهم كارهيين لليهود فى الوظيفه وبالتالى سهل استهدافهم .. و بالتالى اتقفلت الوظايف .. ودا لان نفس الموقف اتكرر السنه اللى فاتت لما اتعمل اعلان بيستهدف الامريكين من اصل افريقي او اسبانى .. وبالتالى غالبا هيتم كمان منع الاستهداف عن طريق العرق عشان يضمن عدم استخدام الاعلانات فى مواضيع التمييز الديني والجنسي .. وحاليا وحسب البيان الصادر عن الفيس بوك (شوفه من هنا https://newsroom.fb.com/news/2017/09/updates-to-our-ad-targeting/) يقدر اى حد يبلغ عن اى حقول استهداف شايف انها ممكن تعمل مشاكل بأى شكل
الرأى التاني بيقول ان التعديلات دي بسبب دخول إعلانات الــ Messenger و إعلانات الــ WhatsApp إللي بدأ الفيسبوك ينزلها كتجربه فى بعض البلاد ، وزى اعلانات الفيديو اللى نزلت كبث تجريبي فى امريكا من شهرين، واننا هنشوف تطوير كبير فى الاعلانات يخلينا قادرين نستهدف العميل من قلب بيته ونتواصل معاه بشكل سريع سواء ع الماسنجر او الواتس اب عن طريق رسايل الانبوكس او الBroadCasting او انه مثلا اتنين بيتكلموا عن الملابس فيلاقوا اعلان شركه الملابس بتاعتك ظهر لهم و هكذا
من الآخر : فيلومارك بيقولك لو هتعمل إعلان لأول مره ومحتاج تقييم النتايج، أو لو هتعمل اعلان تستهدف فيه عملائك بالوظيفه او التعليم إهدى واستنى كام يوم لحد ما نفهم اللى بيحصل .. لكن لو شغلك قائم ع الاعلانات ومش هينفع تقف ف عندك حوالى 27 الف حقل ممكن تستهدف من خلاله وتقدر تكمل زى ملايين البيدجات اللى بتعمل اعلانات
#Facebook #PhiloMarketing
x
ليست هناك تعليقات:
إرسال تعليق