#البرشطة_مدرسة الهاشتاج اللطيف اللى يطلع منه الف فكرة لحملات اعلانيه، لكنه كان من نصيب الحملة اللى ملت شوارع القاهره و اللى اغلبنا كان متوقع انها تكون لشركة Uber واللى أسفرت عن شيئ من الفراغ متمثل فى الفيديو دا .. ودا لاسباب منطقية هى :
- مفيش رابط حقيقي بين السلوجان والكامبين .. ايه علاقه #البرشطة_مدرسه بـ #أوصل_مع_أوبر؟!
- الموضوع مش راكب على بعضه، ايه علاقة الباركور بأوبر بالصعاب والطيران بتوصيلة بالبرشطة .
- الحملة لمعتت فكرة البرشطة اكتر ما لمعت اوبر
- الاعلان ركز طول الوقت علي الولدين اللي بيعملوا باركور وخلانا نرتبط عاطفيا بالشخصيات البراشوت
- الحملة استهدفت الشباب اللى بتبرشط على عربيات اصحابها اللى بيركبوها ببلاش وبتقولهم تعالى اركبو اوبر بفلوس
- بديل اوبر المفروض انه كريم او المواصلات العادية وبالتالى اسقاطه للاعلان على وكلامه المنصب عربيات اصحابك دا مش بيقدم اوبر كبديل لمنافسينه
- في حاجه وقعت في النص لان الكلام والشغل اللي معمول بيدل علي كده
- الفويس اوفر مش ماشي مع جو الاعلان اللي كان حماسي الاول بعد كده بقى فيه نكته بعد كده واحد عجيب طلع مش عارف منين عشان يقول الرسالة اللي مالهاش دعوة لكل اللي فات ده ب تون مختلف عن الجو اللي فات ده كله.
- والحقيقه ان الاعلان مش جذاب وطويل على الفاضى كان ممكن بأبسط من كدة يوصل فكرته وبطريقة فعالة أكتر
- وقيل ان نص الاعلان مسروق من concept assassin's creed بالظبط من شركة ubisoft .. لكن احنا مش متأكدين من المعلومه دى ..
واظرف تعليق اتقال عن الاعلان دا :
أنا مشكلتي مع الاعلان في الـ Call to Action أنا خرجت من الاعلان ان البرشطة دي حاجه كويسه ومقبولة، طول مدة الاعلان بيبني في الهيرو بطل الاعلان ويبني فيه كمصدر قوة والهام مع تكرار كلمة هنوصل هنوصل والكادر معاه وهو طلع فوق البرج وقبل التحدي وعمل قفزة .. خلاص انت هتقوم تسقف بقى .. وفجأة يقولك لأ لأ اهدم ده كله ومتعملش زيه! واعمل اللي هقولهولك في آخر ثانية بس معلش هبقى أحاول أقنعك بيه وقت تاني لان وقت الاعلان خلص! ده الفيلم اللي أحداثه كلها قوية ونهايته كانت ضعيفه محدش بيفتكره والعكس صحيح. زي ما الانترو مهمة النهاية لا تقل أهمية ابدا ابدا.
ورغم احتراماً لشركة King Tut's Playground- KTP اللى نفذت الإعلان و اللى تألقت جداً بعد إعلان الدندو إلا أننا عايزين نقولها الحملة دى كانت دون المستوى بشكل حقيقي وخساره فيها التصوير والاخراج الرائع دا
ليست هناك تعليقات:
إرسال تعليق